Dous padexeiros do Naútico de Pontecesures, Adrián e Rebeca, entre os candidatos a entrar nos grupos de tecnificación da RFEP

Mentres os mellores padexeiros séniores, sub 23 e júniores españois ultiman as súas respectivas preparacións de cara ás grandes citas internacionais do ano, a elite da categoría cadete exprime a tempada coa vista posta no acceso aos grupos de adestramento do Plan Nacional de Tecnificación Deportiva da Real Federación Española de Piragüismo (RFEP) do 2013. Grupos de padexeiros júniores diseminados pola xeografía nacional que traballan baixo a supervisión directa de técnicos federativos, e coas vatanxes que iso lles reporta á hora de prepararse para os controis selectivos polas prazas en xogo para os campionatos continental e mundial da correspondente tempada.

Despois de computadas a regata clasificatoria do Campionato de España de Inverno, sobre 2.000 metros en augas de Sevilla, e da Copa de España Cadete de 1.000 metros no encoro asturiano de Santa Cruz de Trasona, os responsables do Plan Nacional de Tecnificación Deportiva (PNTD) da RFEP veñen de convocar a unha trintena de kaiaquistas e de canoístas cadetes de último ano a unha concentración a finais do presente mes. Será a última referencia á hora de decidir a identidade dos novos integrantes dos grupos de adestramento júniores do PNTD. E entre eses 30 elixidos, figuran tres deportistas do Baixo Ulla.

Trátase dos kaiaquistas do Náutico Pontecesures Adrián Castiñeiras Troáns e Rebeca Laurijssen Busto, e mais do canoísta Jacobo Gómez Loureiro, das Torres-Romaría Vikinga de Catoira. Os dous rapaces concentraránse en Trasona do 23 ao 26 de xuño, ambos inclusive, mentres que a padexeira cesureña acudirá a Sevilla do 26 ao 29.

Test sobre 200 e 500 metros

Por diante, as tres promesas do Baixo Ulla probarán as súas aptitudes e actitudes en tests específicos sobre 200 e 500 metros, tests de forza máxima en remo en banco, tests de condición física xeral, probas antropométricas e análises da técnica de paleo individual. Ademais, avaliaráse a capacidade de traballo e de convivencia dos deportistas nunha concentración de cara á súa posible incorporación aos equipos nacionais correspondentes a vindeira tempada.

Miguel Tacón Fernández será o técnico ao cargo da concentración da canoa masculina, Ángel Jesús López González da do kaiak masculino, e Jesús Buzón Barba da do kaiak feminino. Narciso Suárez Amador fará o seguimento das concentracións como responsable do PNTD.

LA VOZ DE GALICIA, 12/06/12