NOTA DA ACP DE PONTECESURES
O día 25 de xullo por mor do accidente ferroviario de Santiago de Compostela o alcalde accidental daquela, Ángel Souto, convocou a toda a corporación e consensuáronse as actuacións a levar a cabo na honra dos falecidos (un deles nado en Pontecesures). Aceptamos, os integrantes da oposición, a proposta do goberno local de suspender o pleno ordinario sinalado para o 29 de xullo aínda non sendo un acto suxeito á suspensión, dicindo o alcalde accidental que o pleno ía ser despois dos días de loito oficial e que así podían levarse as contas xerais do orzamento do derradeiro exercicio e que sendo xa un pleno extraordinario levaría tamén, de ser posible dende o punto de vista legal, o punto de rogos e preguntas.
Pois ben; o tempo pasa e o pleno non se convoca. Nin o fixo o alcalde accidental (ocupou o cargo dende o 16 de xullo ata o 9 de agosto) nin o fai o alcalde titular. Non dixo a verdade o Sr. Souto Cordo pois a conta xeral do orzamento xa ía na orde do día do pleno do 29 de xullo (a pesar da suspensión, foi repartida a orde do día o 26 de xullo, advertíndose por todos a clara descoordinación entre os integrantes do goberno local), e o certo é que procede tratala canto antes no órgano colexiado. Por outra banda, axústase perfectamente á normativa legal incluir no pleno a convocar o punto de rogos e preguntas.
En fin; estamos coa desidia de sempre nun goberno local apático que non xestiona os asuntos. Non é de recibo demorar máis a convocatoria do pleno e impedir así á oposición o seu labor de fiscalización da xestión municipal formulando os rogos e preguntas correspondentes. Estase a dar á veciñanza a impresión de que temos un goberno local “de vacacións” e ninguén entende isto con tres concelleiros cobrando unha dedicación exclusiva.
Pontecesures, 12/08/13
Luis Ángel Sabariz Rolán
Concelleiro da ACP Pontecesures