Valga recibe o gran día da festa que ten sabor a anguía e caña.

Hoxe desvélase a mellor augardente de entre os 34 aspirantes

Cunha prolongada celebración, o concello de Valga recibe hoxe o día máis grande da Festa da Anguía e Mostra da Caña do País cun menú que non deixará indiferente a ninguén. A 35 edición promete ter un peche de ouro aínda que resta o día de mañá para degustar todos os pratos.

Os asistentes á quenda gastronómica valguesa poderán escoller entre cinco tapas de anguía e catro cócteles elaborados coa augardente artesanal. Serviranse ata mil unidades a 2,5 euros e, dentro das opcións a escoller, haberá elaboracións de Álex Iglesias. O cociñeiro lalinense ofrecerá o produto en forma de tacos, empanada, fabada e o clásico indispensable da anguía fritida. A restante que se presenta é a gañadora do premio do xurado na edición do 2024 da Ruta-Concurso Tapa a Anguía. Baixo un nome prometedor, o Café-Bar O Pontellón recreará a galardoada Do río ao prato, pasando pola leira, unha crema de grelos con anguía rebozada sobre pan negro.

En canto á bebida, o lalinense tamén será encargado de preparar mil cócteles cunha variedade da caña (a un prezo de dous euros). Paralelamente, onte desenvolveuse a gran final do concurso do licor. Entre os 34 aspirantes clasificaron oito brancos, cinco de herbas e seis tostados. Distinguidos polo aspecto visual, olfactivo e gustativo, hoxe darase a coñecer os gañadores.

Logo da entrega de premios de e dende ás 21.30 horas poderán mercar os tíckets para a degustación. A partir de media noite, haberá queimada popular gratuíta cun conxuro de teatro a cargo de Toula Animación. O parque Irmáns Dios Mosquera unha vez máis volve a ser o escenario gastronómico para todo o público. Non hai escusa, ante as previsións meteorolóxicas de chuvia, dispoñerán dunha carpa.

La Voz de Galicia