A Asociación Galega de Linfedema organiza unha ruta en bote dragón polo Ulla aberta a todos os públicos.

Imaxe dun bote dragón.

A iniciativa está programada para este domingo, a partir das dez e media co Club Náutico Pontecesures como punto de saída

AAsociación Galega de Linfedema, Lipedema, Insuficiencia Venosa Crónica e outras Patoloxías Vasculares Periféricas (AGL) organiza, coa colaboración do Club Náutico Pontecesures e da Xunta de Galicia, a Primeira Edición da Ruta Fluvial Dragon Boat (bote dragón) polo río Ulla, unha iniciativa pioneira en Galicia que combina deporte, saúde e sororidade entre mulleres superviventes de cancro de mama.

A proposta deportiva celebraráse este domingo, 30 de novembro, desde as 10.30 horas nas instalacións do Club Náutico Pontecesures, desde onde se partirá para realizar un percorrido simbólico polo río Ulla.

A actividade está aberta a calquera con interese en participar, e ten como obxectivo promover o benestar físico, emocional e social das persoas participantes, subliñando o valor terapéutico e simbólico do dragon boat como ferramenta de recuperación e de apoio.

Durante a xornada realizaránse actividades de quecemento guiado, a ruta fluvial, un acto conmemorativo en homenaxe ás compañeiras e un espazo final de convivencia cun refrixerio saudable.

O barco dragón, ademais de ser un deporte en crecemento, é recoñecido polos seus beneficios na prevención e na mellora do linfedema, na recuperación da forza e da capacidade pulmonar, así como no benestar emocional das mulleres que o practican.

Esta primeira edición pretende consolidarse como unha cita anual de referencia en Pontecesures, unindo saúde, superación persoal e visibilidade social. «Remamos xuntas pola vida, pola superación e pola esperanza», sinalan dende a Asociación Galega de Linfedema, impulsora desta acción solidaria e de saúde pública.

La Voz de Galicia