Antonio Cortés

A Deputación subministrará mobiliario ós vestiarios de preto de 60 campos de fútbol da provincia.

35 concellos sumáronse á iniciativa da Administración provincial para mellorar estas instalacións deportivas
Cincuenta e cinco campos de fútbol de 35 concellos da provincia recibirán proximamente mobiliario para os vestiarios das súas instalacións deportivas (bancos e colgadores de roupa).

Así o anunciou esta mañá o presidente da Deputación, Rafael Louzán, na rolda de prensa posterior á Xunta de Goberno, onde incidiu en que se trata dunha iniciativa impulsada pola Administración autonómica, despois de comprobar que moitos dos campos que se dotaban de herba sintética tiñan notables carencias no amoblamento dos vestiarios.

Co obxectivo de corrixir estas deficiencias e dotar a todos os concellos dunhas instalacións deportivas nas mellores condicións posibles, a Deputación decidiu, aproveitando as instalacións de Príncipe Felipe, que conta cuns magníficos obradoiros de carpintería, poñer en marcha un taller para fabricar o mobiliario necesario e doarllo posteriormente ós concellos que o demanden.

Unha vez rematado o prazo para presentar estas solicitudes, demandaron mobiliario para cadanseu campo de fútbol os concellos de Cotobade, Marín, Oia, Meis, Arbo, A Cañiza, Campo Lameiro, Salvaterra de Miño, Agolada, Pontecesures, Moraña, Ponte Caldelas, O Rosal, Meaño, Portas, As Neves, Vila de Cruces, Lalín, Rodeiro e O Grove.

Pola súa banda, Sanxenxo precisa novo mobiliario para tres campos de fútbol, ó igual que Cangas do Morrazo, Valga, Vilaboa, Gondomar, Nigrán, Barro, Tomiño, A Estrada, Mondariz, Ponteareas, Tui e Forcarei. O Porriño demanda mobiliario para os catro campos que ten en activo e para os dous que se están a construír nestes momentos.