O prazo para solicitar estas axudas é dende o 16 de febreiro ata o 26 de marzo. Máis información e solicitudes no Servizo Social Comunitario do Concello os luns, martes e venres de 9.00 a 13.30 h.. No seguinte enlace pódese descargar o bando completo:
http://pontecesures.org/recursos/Bando_PFC_menor_3_anos_2012.pdf
Este venres 17 de febreiro de 2012, a partir das 11h30, o CPI PONTECESURES celebra o Entroido. Trátase dunha actividade común a todo o centro e a ela están convidados as familias dos alumnos e alumnas.
Este ano o tema escollido é o das Olimpiadas. Os diferentes grupos de nenos e nenas desde educación infantil até educación secundaria obrigatoria, pasando por educación primaria desfilarán no pavillón municipal de Pontecesures ante os seus familiares caracterizados de diferentes maneiras alusivas ao deporte olímpico e realizando diferentes bailes.
Tendo en conta os tempos que corren, cheos de negros presaxios, nada mellor que a suspensión que nos permite o Entroido para divertirnos e rirnos e así liberarnos das tensións. Por iso, animamos a todas as familias a que se acheguen ao pavillón municipal de Pontecesures para dar acubillo á ilusión dos nenos e nenas.
Este mércores 15 de febreiro o concelleiro de obras, urbanismo e servizos, Angel Souto, asistiu a unha xornada sobre normativa urbanística para cargos electos.
Esta xornada estivo organizada pola EGAP (Escola galega de administración pública) en colaboración coa Dirección xeral de Adminitración Local.
Nas vacacións de entroido os/as nenos/as dispoñen duns días de tempo libre, por iso a asociación cultural Entretemenlo, coa colaboración do Concello de Pontecesures, vai levar a cabo unla Ludoteca de Entroido, os días 20, 21 e 22, de 9h a 14 h., no local anexo ao pavillón de deportes. Esta actividade vai dirixida a nenos e nenas de 4 a 12 anos, e o prezo é de 6 ?.
Poden inscribirse nas oficinas do Concello a partir do 16 de febreiro, e poden ter máis información no teléfono 986 55 71 25.
O Concello de Pontecesures acolle a historia en imaxes de Salama e Jadidja, un neno e unha nena saharauís que forman parte do programa de Vacacións en Paz que trae cada verán a España a rapaces e rapazas que viven e crecen nos campos de refuxiados de Alxeria. A mostra fotográfica e o documental, elaborado pola Asociación Galega de Reporteiros Solidarios (Agareso) reflicte a súa experiencia estival en Galicia e a súa vida cotiá no deserto.
O fotógrafo Pelu Vidal, xunto coas xornalistas Natalia Puga e Lara Varela, e o cámara Suso Lago, baixo a coordinación de Laura López, realizaron este proxecto de sensibilización no 2008. Tivo como un dos seus resultados a exposición fotográfica «De Sanxenxo ao Sáhara: Vacacións en Paz», que este xoves ás 20.00 horas se presenta no Concello de Pontecesures (Na Casa do Concello), xunto co documental «De Sanxenxo ao Sáhara: Vacacións en Paz», que tamén será proxectado na presentación. A exposición foi financiada polo Concello de Sanxenxo.
Por parte de Agareso acudirán á presentación as voluntarias de Agareso Lara Varela, Natalia Puga e Laura López, coordinadora do proxecto.
No verán do ano 2008, este equipo de reporteiros e reporteiras de Agareso seguiu a estanza dos dous nenos saharauís en Sanxenxo, xunto coa súa familia de acollida en Galicia, e acompañounos no seu regreso ao seu fogar despois de pasar dous meses na nosa terra. O programa Vacacións en Paz, operativo desde hai 18 anos, permite dar unha tregua aos máis pequenos durante os meses estivais, cando as temperaturas no deserto rondan os 50 graos.
España é un dos destinos destas estanzas estivais de miles de nenos que reciben así a aperta dun país onde as vacinas, os medicamentos, a tecnoloxía, forman parte da vida cotiá, pero que na súa realidade habitual escasean. Ás atención médicas que reciben, se suman o sentimento das familias de acollida, que acaban integrando a estes nenos e nenas como un máis da súa casa.
