A Fundación Rosalía de Castro vén de celebrar o acto conmemorativo do pasamento da escritora, un 15 de xullo de hai 129 anos, na Casa-Museo de A Matanza, en Padrón. Alí, o presidente da entidade, Anxo Angueira, aproveitou para lembrar que, despois da conmemoración no 2013 dos 150 anos da publicación de Cantares Gallegos, «a vida e os camiños» da fundación rosaliana continúan
, por novos «horizontes».
Entre eles, para seguir «modernizando a Casa– Museo de A Matanza e incorporando novas obras, algunhas en propiedade e outras en cesión», di. Así, desde xaneiro deste ano, «a Casa de Rosalía é outra», segundo Anxo Angueira, debido a que a ela regresou a autora retratada en Lestrobe arredor do ano 1880 no «extraordinario óleo» de Brocos.
A volta do cadro foi posible, segundo afirmou Angueira, grazas a xenerosidade da Deputación, as xestións do alcalde de Padrón e ao proxecto intelectual de Pepe Barro. Namentres, no proxecto de modernización museográfica para a planta baixa, a fundación agradece as xestións ao alcalde de Rois diante da Deputación, entre outros recoñecementos.
Relación social e institucional
Anxo Angueira asegura que «a vida e o labor» da Fundación Rosalía de Castro «está sempre vinculado á súa relación social e institucional»: cos concellos veciños da Terra de Iria, en especial co de Padrón, ao que lle agradece ao seu apoio; con asociacións locais ou nacionais, desde o colectivo de Nais e Pais de Persoas con Discapacidade Intelectual do Sar (Amipa); o club de lectura Lecras de Dodro; a Revista Galega de Educación ou a Casa Museo de Camilo Castelo Branco ou á de García Lorca.
Para o responsable da fundación, «non hai outro camiño có da apertura social e a colaboración» porque «Rosalía está aquí, na Matanza, pero a súa casa está e é de toda Galicia», di Anxo Angueira.
La Voz de Galicia
