A Copa de España Sprint de 1.000 metros pechouse o pasado domingo no encoro asturiano de Trasona con sensacións opostas cando miramos a dous dos barcos que máis alegrías lle veñen dando nos últimos anos ao piragüismo arousán. Co K-2 1.000 de Camila Aldana Morison e Raquel Dacosta (Náutico Pontecesures) ameazando con exportar o seu insultante dominio nos seus anos júniores a unha categoría absoluta na que o sábado estreaban condición de dúo sénior nunha proba estatal facéndose co ouro en 4.00,874. E sacándolles nada menos que 3,840 segundos ás subcampioas, as vascas do Donostia Kayak Begoña Lazkano e Amaia Benavente, e 4,570 á parella do Breogán do Grove composta por Natalia García Naveiro e Nuria Villacé Redondo só un día despois de que, decisións de seleccionador nacional, Morison gañase o selectivo para o Europeo Absoluto no K-2 1.000 con García emparellada Dacosta cunha kaiaquista extremeña.
Falabamos de dous barcos. E se o K-2 do Náutico Pontecesures ofreceu a lectura positiva, o C-2 1.000 de Diego Romero e Tono Campos animou á reflexión. Porque a sete días do selectivo que decidirá o representante de España no Preolímpico de Duisburgo do vindeiro mes, a parella que veu dominando a modalidade a nivel nacional nos dous últimos anos víuse superada, e con claridade na liña de meta, polo equipo do Piragüismo Poio formado por Sergio Vallejo e Adrián Sieiro, gañadores da Copa 1.000 en dura pugna co cesureño André Oliveira e o seu compañeiro asturiano no Náutico Firrete, David Fernández, subcampión na mañá do sábado no C-1 1.000 por detrás de Diego Romero. Vallejo e Sieiro pecharon a final do C-2 en Trasona cun crono de 3.49,418, tan só 15 milésimas de segundo por diante de Oliveira e Fernández, con Campos e Romero bronce a 2,015.
En todo caso, o Breogán tivo bos motivos para a celebración. Con dez medallas individuais e un terceiro posto na clasificación xeral de clubs -segundo nas categorías séniores- ao sumar 482 puntos totais, polos 679 do Kayak Tudense e os 501 do Náutico Sevilla. Un resultado que sitúa o club grovense terceiro da xeral provisional da Liga Nacional Hernando Calleja cos mesmos 195 puntos cá Escola Piragüismo Aranjuez, co Tudense líder con 210 e co Náutico Sevilla segundo con 204.
Título para o illense Ramón Ferro
Ademais dos dous metais apuntados, Diego Romero e Tono Campos participaron o domingo tamén na prata do C-4 1.000 do Breogán, formando equipo con Manuel Sánchez e con Adrián Fernández. Remataron a 0,642 segundos do barco do Tudense, que contou coa pa do illense Ramón Ferro entre a súa tripulación. Un resultado mellorado polo K-4 500 do equipo meco, gañador da Copa de España en 1.51,639.
Os cinco podios individuais restantes do Breogán chegaron da man das súas dúas paracanoístas. A grovense Elena del Mar Naveiro foi subcampioa en KL3-1 200 Sénior, coa vallisoletana María Calvo bronce na mesma proba e campioa Sub-23, medallas ás que sumou sendos ouros en VL3-1 200 sénior e Sub-23.
La Voz de Galicia
