Por unhas copas ou outras toca correr.

Sempre se fala de que un mozo con un bo coche a altas horas é un perigo. Eu non o creo, pero estou convencido de que un mozo con copas de máis, aínda que teña un vehículo destartalado, pode ser unha seria amenaza na estrada. ¿E logo, de quen é a culpa? Non vou eu descubrir aquí nada que non se escribira xa, pero o alcohol está reñido co volante.

Pero o que sucede nas fins de semana de Pontecesures, ou aínda na Estrada coas motos, non ten moita lóxica. Despois dunha noite de esmorga, toca facer o tolo co coche. Aceleróns, freadas, trompos e, de seguro, máis que un susto. Son carreiras estúpidas que de seguirse facendo, algún día nos levará a tirarnos dos pelos para lamentar algunha vítima. Claro que de momento é mellor mirar para outro lado. Total, mentres non pase nada…

E non me resisto a seguir dicindo que a xente con máis de dúas copas no lombo -ás veces seguro que son bastantes máis de media ducia- é moito máis atrevida e non valora o risco. E aínda peor, no caso de moitos mozos, nin ó día seguinte se dan conta do que puido pasar coas súas vidas nin do perigo en que puxeron ós demais.

�? mellor que en vez de pensar en correr despois das copas o fagan ó revés e pensen nas copas despois de correr. E para exemplo, nada mellor que ver o que pasou en Negreira. Máis dun milleiro de persoas saíron á rúa coa sa intención de divertirse e, aínda por riba, algunhas levaron unha copa para casa.

Paréceme que a diversión pode ir por barrios, pero é moito máis sa a dos aventureiros de Negreira que a dos temerarios de Cesures.

Artículo de Victor Furelos na columna «COUSAS DO DEMO» de TIERRAS DE SANTIAGO, 13/11/07