Os alustros e os tronos obrigan a celebrar o pincho da Parroquia no Centro Social.

Mañá tremenda a de hoxe, día do patrón San Xulián, en Pontecesures. Choiva abondosa, forte vento, alustros e tronos foron a característica da mañá. Isto afectou negativamente ás celebracións festivas. O grupo de gaiteiros de Algueirada case non tivo oportunidade de tocar os pasarrúas agás algunha peza en local pechado e outras na carpa da Plazuela antes da misa.
Non houbo procesión, e o aperitivo da parroquia tivo que degustarse ao remate da misa no Centro Social. Asistiron, con todo, bastantes veciños e os máis animados aínda se marcaron no recinto algún pasodoble ao son das gaitas de Algueirada.