Nota íntegra da ACP sobre o peche da escola infantil de Pontecesures estes días de agosto.

Hai tempo que o goberno local comunicou que a empresa que está a cargo da Escola Infantil de Pontecesures remataba o contrato de explotación no día de hoxe (31/07/13) e por iso foi convocada a licitación para un novo contrato do servizo.

Con sorpresa observamos que a día de hoxe non se coñece a adxudicación do novo contrato (optaron ao parecer catro empresas) e como a empresa actual cesa e nada se sabe da gañadora da licitación, temos unha consecuencia tremenda pois a pesar de que hai máis de 15 nenos/as interesados en utilizar o servizo da gardería en agosto, mañá, día 1 de agosto, a gardería estará pechada co conseguinte prexuizo para este servizo público e para imaxe da entidade.

O sexa; hai unha incertidume agora en canto aos días de agosto nos que estará pechada a gardería, nada se sabe da subrogación do contrato das traballadoras no caso de que sea outra a adxudicataria do servizo como se reflicte no prego de condicións, se estas causan baixa, se van percibir as retribucións en agosto, etc…

En fin, xestión nefasta e pouca seria dun goberno local que deixa este tema tan importante para última hora. Estamos ante a inoperancia de sempre cun alcalde practicamente ausente e cun concelleiro de educación e servizos sociais, Roque Araújo, totalmente desaparecido e desprazado neste tema da escola infantil a pesar de que cobra por unha adicación exclusiva que pagamos todos.

Pontecesures, 31/07/13

Luis Ángel Sabariz Rolán
Concelleiro da ACP Pontecesures