Os voceiros da oposición non formularon acusación algunha contra a concelleira Cecilia Tarela. As graves acusacións de que a concelleira tratou de impoñer unha directora elixida por ela á anterior empresa adxudicataria foron formuladas durante a vista do xuizo por despido celebrado o xoves no Xulgado do Social de Pontevedra pola representación da parte denunciante, segundo aparece reflectido nun medio de comunicación o sábado 15 de marzo que reproduce manifestacións literais de dita parte.
No día de onte, os voceiros da oposición, preocupados por este grave feito e pola imaxe da institución, sen entrar no fondo do asunto do xuizo de despido, solicitaron unha explicación da representante municipal sobre a veracidade ou non das afirmacións realizadas pola parte denunciante.
Xa coñecemos a resposta de Cecilia Tarela que afirma que as acusacións son falsas. Pois ben; o que pode facer entón a concelleira é denunciar ás persoas que lle fixeron tan graves imputacións en sede xudicial e non arremeter contra a oposición. As probas, en todo caso, deberá solicitarllelas a eles.