Trátase de salva-lo tren do pobo liso e chan. Ese tren que acotío usan centos de persoas para ir e regresar do traballo, para acudir a estudar, desprazarse ó médico, saír de compras ou sinxelamente polo pracer de viaxar en tren, ou outros que ou non teñen idade ou a sobrepasan para conducir un vehículo, e en definitiva cantos non poden dispor de automóbil de outro medio propio. E incluso dalgúns que aínda posuíndo tal, prefiren usalo tren por mor de evitar atascos de circulación, perigosidade nas estradas, etc.
Xa se farán de conta que estamos a falar do tren de proximidades que nos queren quitar, tratando de xustificar a súa supresión pola futura aparición do AVE, sen que “ese pobo” do que ao comezo falamos poida comprender porque non han de poder seguir prestando o seu inestimable servizo os actuais trens de proximidades ademais do AVE, cando chegue, considerando ámbolos dous perfectamente compatibles, ao tempo que os cidadáns se sentirían moito mellor atendidos.
Así o entenden a maioría dos habitantes dunha poboada zona comprendida entre Pontevedra e Santiago, polo que se dispoñen a amosar a súa negativa a tal supresión mediante unha manifestación o vindeiro 7 de maio, ás 8 do serán, no paseo da alameda de Santiago de Compostela. Dicir tamén ao respecto que xa nestes momentos resulta sinxelamente penoso enxergar a calamitosa situación de abandono en que se atopan algunhas das estacións de Renfe no citado percorrido.
¡OGALLÁ! as protestas cheguen aos oídos dos que realmente poden solucionar o problema para ben de todos.
Por José Castro Cajaraville. Cronista de Padrón. TIERRAS DE SANTIAGO, 29/04/08