No día de hoxe, presentouse na Casa do Concello a seguinte moción:
Margarita Carolina García Castro, Manuel Luis Álvarez Angueira, Cecilia Tarela Barreiro, Xosé Antonio Baliñas Pazos e Arturo Ferro González, concelleiros do grupo municipal do BNG de Pontecesures apresentan a seguinte moción para ser incorporada na orde do día do próximo pleno, xa teña este a condición de ordinario ou extraordinario.
Exposición de motivos:
A poboación galega está inmersa nun contínuo proceso de envellecemento onde cada ver o que demos en chamar 3ª idade está a se constituir nun segmento poboacional máis importante no que a esperanza de vida está a ser maior, e Pontecesures non é alleo a este proceso incluso a pesar de contar cunha importante taxa de natallidade.
A lei 13/2008, do 3 de decembro de servizos sociais de Galicia, atribúe aos concellos, en canto administración máis próxima aos cidadáns, e en consonancia coa lexislación aplicable sobre réxime local, competencias sobre a creación, xestión e mantemento tanto de servizos sociais comunitarios básicos como de servizos sociais comunitarios específicos, entre outras. Asi mesmo, os concellos para a mellor atención das necesidades sociais do seu ámbito territorial poden crear, xestionar e manter servizos especializados en coordinación coa Xunta de Galicia.
Os nosos maiores e as nosas familias necesitan xa, agora, contar con axuda das administracións a fin de facilitarlles unha maior calidade de vida, e en parte a ilo contribúen, sen lugar a dúbida, os centros de día para maiores, que se definen como centros xerontolóxicos socioterapéuticos e de apoio ás familias, que durante o día prestan atención terapeútica e plural ás persoas maiores con dependencia ou en risco grave de padecela, promovendo a súa autonomía persoal, a actividade relacional e a permenencia no entorno habitual.
Eetase a estender, co fin antedito, unha rede de centros de día por toda Galicia, e Pontecesures non debe quedar atrás e debe contar XA con este servizo, cada día máis imprescindibel. Na actualidade veciños deste pobo vense na obriga de se desprazar a centros de día de municipios limítrofes, aqueles que tiveron a sorte de atopar praza, mentres outros seguen a esperar por unha infraestrutura e por un servizo que este concello non é quen de lle prestar.
O BNG local, durante a súa responsabilildade de goberno, non foi alleo a esta necesidade, procedendo o goberno por él encabezado, primeiro a tramitar a desafectación das antigas casas dos mestres, situadas na rúa Pousa Antelo, a carón da Escola Infantil Municipal. Unha vez acordada esta en novembro de 2006, e vendo como moi idónea esta situación, para a construción dun centro destas características, procedeu a encargar un anteproxecto de centro de día para maiores (redactado polo arquitecto D. Carlos Besada Ferreiro) e enviado á Xunta de Galicia en marzo de 2007.
No anteproxecto apresentado, para un centro tipo de 30 prazas, sse facia constar que a construcción nesa situación axustábase por completo á legalidade urbanística segundo o PXOM de Pontecesures, extremo que corrobora e ratífica o arquitecto munnicpal, D. Jorge Duarte Vázquez, nun informe emitido en agosto de 2007 a instancias do goberno local.
En novembro de 2007 ten entrada no concello de Pontecedures un escrito da Subdirección Xeral de Autorización e Inspección de Centros, da Vicepresidencia da Xunta de Galicia, no que informa FAVORABLEMENTE, acerca da viabilidade do Centro de Día de Poantecesures nesta situación, coa obriga de corrixir algunhas deficiencias de carácter técnico que presentaba o proxecto.
Polo tanto, non cabe ningunha dúbida da idoneidade desta ubicación como o corroboran os informes técnicos do arquitecto redactor do anteproxecto e do informe favorable de viabilildade da propia Xunta de Galicia.
Nos medios de comunicación o actual goberno local comunicou á cidadanía a súa intención de cederlle a S.A. de Xestión do Xacobeo as instalacións e os terreos (que deben ser destinados a centro de día para maiores), para que esta constrúa alí un albergue de peregrinos.
O concelleiros asinantes desta moción consideramos que é a obriga dos gobernantes priorizar nas necesidades e, polo tanto, nos investimentos que o pobo necesita, e non opoñéndonos a que Pontecesures poida contar cunha instalación deste tipo, cremos que primeiro e ante todo, está atender á consecución de servizos para os nosos veciños e para as nosas familias. As escasas zonas públicas de equipamentos con que conta o concello deben ser empregadas con racionalidade e sentido común e non con «caprichos». Así mesmo, e logo do exposto, non consideramos que sexa un lugar axeitado para un albergue de peregrinos, pois ao estar lonxe do centro do pobo, pouco ou nada contribuiría a un sector económico fundamental para o noso concello como é a hostalería e o comercio en xeral.
En consecuencia, o grupo municipal do BNG solcita ao pleno a adopción do seguinte acordo:
1. Que se manteñan os terreos que ocupan as antigas casas dos mestres para a construción dun centro de día para maiores.
2. Que se realicen diante das diferentes administracións, de forma urxente, todas cantas xestións sexan necesarias para que o servizo prestado aos maiores e familias deste concello con este centro, sexa unha realidade canto antes, considerándose polño goberno municipal unha prioridade irrenunciabel.
3. Que se atope unha situación alternativa para un albergue de peregrinos, máis próxima ao centro do pobo, pois só así sería relamente beneficioso para a hostalería e comercio en xeral.
Pontecesures, a 10 de decembro de 2009
Asinado polos concelleiros do grupo municipal de BNG.