Excursión cultural dos nenos do colexio de Cordeiro, para ver aos novos amigos.

O alumnado do Ferro Couselo e do Praza de Barcelos compartiron diferentes actividades ao longo da xornada.

Esta semana o alumnado do primeiro e terceiro ciclo de Primaria do CEP Xesús Ferro Couselo, de Cordeiro (Valga), viaxaban a Pontevedra dentro das actividades de intercambio que se iniciaron hai uns meses, cando os pontevedreses viaxaron ata Cordeiro para compartir unha xornada escolar cos cativos.
A experiencia desta semana foi moi frutífera, sobre todo para os maiores, de quinto e secto, porque lles serviu para coñecer un pouco máis aos seus novos amigos e así afianzar os vínculos de amizade que se iniciaran hai uns meses, durante a primeira visita.

A xornada comezou coa chegada dos valgueses ás instalacións do CEIP Praza de Barcelos, ubicado na zona centro da cidade do Lérez, e a súa distribución segundo a súa idade. Os máis cativos compartiron pupitre cos pontevedreses mentras que os maiores foron convidados polos anfitrións a coñecer os lugares máis destacados e importantes da capital da provincia, aínda que antes tiveron a oportunidade de coñecer as dotes artísticas dos seus compañeiros, xa que os do Praza de Barcelos deleitaron aos valgueses cunha pequena sesión de contacontos e unhas pezas interpretadas á frauta.

Chegada a hora da merenda matutina, o equipo docente fixo entrega non só aos convidados senón tamén aos seus alumnos, dunhas chocolatinas, bocadillos e zumo, para coller folgos.

Ao mediodía, e antes de volver aos respectivos centros, os de Valga e Pontevedra foron recibidos polo alcalde da cidade, Miguel Anxo Fernández Lores, así como polo director e profesorado do CEIP Praza de Barcelos. O rexedor quixo coñecer a opinión que os convidados levaban da cidade e dos seus alumnos, ao que os valgueses contestaron que lles gustaría repetir a experiencia.

DIARIO DE AROUSA, 01/05/09