Adeus querido Pepe.

Con tristura recibo a nova da morte de Pepe “O Lebre” e veñen a miña lembranza bastantes momentos amenos que pasamos xuntos. Era Pepe moi faladoriño e ainda que tratabamos moitos temas, sempre rematabamos falando de política, sen dúbida, o tema favorito deste histórico miltante socialista cesureño. Contaba divertidas anécdotas e asuntos importantes relacionados coa súa militancia na clandestinidade, coa transición, coa historia da vida municipal, cos plenos do concello, cos temas de actualidade sobre todo cando se achegaban procesos electorais xerais, autonómicos ou locais, e con outras cuestións políticas. Tiña uns ideais Pepe que non abandoaba, non o achantaba ninguén e incluso todos percibíamos como nalgunha tertulia cando alguén lle decía aquilo de “Cala, Pepe”, el creciase e facíase escoitar se cadra máis.

Para min foi unha honra que este home de ben, honrado e que decía as cousas á cara sen agocharse, crera en min e no noso proxecto dando a cara nos momentos difíciles da miña traxectoria política. Aguantou a crítica con toda a enteireza do mundo e iso tereino en conta sempre na miña vida. Vaia dende aquí a miña lembranza máis agarimosa para Pepe e o máis sentido pésame á familia. Descansa en paz, valente amigo.

Luis Ángel Sabariz Rolán