Escrito da ACP sobre a suspensión das actividades no ximnasio do CPI Pontecesures.

Sr. D. César Augusto Pérez Ares
Xefe Territorial de Educación de Pontevedra

O día 25 do pasado mes de outubro xa se lle comunicou que as pingueiras no ximnasio do CPI Pontecesures estaban a causar problemas para o desenvolvemento das actividades docentes (houbo que colocar caldeiros no solo) e a danar o piso de madeira do recinto.

Pois ben; nada se fai e agora veñen as consecuencias. No día de hoxe, por mor de estar a madeira levantada, suspendéronse as actividades escolares e extraescolares no ximnasio, ata que o piso sexa recolocado ocasionándose os conseguintes gastos.

Unha vez máis solicítase a reparación urxente da cuberta do ximnasio que é unha responsabilidade da Xunta de Galicia pois, como todos sabemos, quedou con deficiencias estruturais cando foi construído o edificio. Débese considerar prioritaria esta actuación xa que a comunidade educativa non pode estar cada dúas por tres sofrindo este problema que afecta negativamente a todos.

Pontecesures, 06/11/13

Luis Ángel Sabariz Rolán
Concelleiro da ACP Pontecesures