O Concello de Pontecesures reclama á Deputación melloras na sinalización da Avenida dos Namorados.

Tense observado que hai un número elevado de camións de grandes dimensións que de maneira errónea entran na Avda dos Namorados, vial de titularidade da Deputación de Pontevedra, levados erroneamente polas indicacións de dispositivos GPS, con dirección á factoría de Nestlé.

Este feito está a provocar inconvenientes na seguridade da vía, xa que dito vial desemboca na Praza dos Valeiros, que non ten saída e na que é imposible facer un cambio de sentido, polo que ser ven obrigados a circular durante todo o percorrido en sentido de marcha atrás ata a rotonda da estrada PO-548.

A fin de garantir un uso axeitado da vía para as tonelaxes e a tipoloxía de vehículo para a que foi concibida, o Concello de Pontecesures enviou un escrito á Deputación de Pontevedra solicitando melloras na sinalización qeu eviten confusións e atrancos por parte de estes vehículos pesados e se mellore a seguridade na circulación para o resto de vehículos e peóns que discorren por dita vía.