José María Bello Maneiro buscará unha nova maioría absoluta o vindeiro día 26. Farao tras un mandato marcado polos procesos xudiciais, pero coas ganas de seguir “traballando polos veciños”.
Hai quen di que a súa etapa na Alcaldía está máis que rematada, non por idade, senón por falta de ideas…
Non vou entrar a valorar os pensamentos da oposición. Eu remítome aos
proxectos que se executaron tan só estes catro anos. Temos moitas
ideas, boas para Valga e positivas para o benestar e calidade de vida
dos veciños.
Este mandato estivo moi xudicializado. Pensa que é algo que o pode perxudicar nas urnas?
O PSOE centrouse única e exclusivamente en intentar conseguir nos xulgados o que non conseguira nas urnas en lugar de defender os intereses de Valga. A candidata e ex afiliada do PP só entende de medrar en política. Pasou de aplaudir a Manuel Fraga a ser candidata do PSOE. Esa é a credibilidade que ten. Debería presentar a súa renuncia despois de que se arquivase a denuncia.
Que opina da irrupción de Valga Viva nestes comicios?
Sempre dixemos que o que tiñan que facer as mareas era presentarse ás eleccións en lugar de descalificar ao goberno nas redes. Agora é o momento de que os veciños opinen da campaña marulleira que fixeron.
Que queda por facer en Valga? Cales son os proxectos que leva na axenda para estes catro anos?
O noso proxecto é seguir ofrecendo aos veciños máis e mellores servizos. A idea é facer realidade o parque empresarial de Valga para ofrecer máis solo industrial ás empresas. No eido da educación acadar o Bacharelato de Artes para o IES e poñer a funcionar o Conservatorio Superior de Música. Dar un impulso ao sector turístico da man dos recursos naturais dos que podemos presumir e do Camiño de Santiago, para que exerzan como xeradores de riqueza e dinamizadores da economía local. En definitiva, seguir ofrecendo benestar e xerando oportunidades para os veciños de Valga.
Diario de Arousa
