«Hai moita xente no PP á que lle gustaría que eu dimitise»

Entrevista a Pose.

Pasou o que pasou. E hai voces que piden máis dimisións ca de León. Pose en absoluto o comparte.

A min nin se me pasa pola cabeza dimitir. ¿De que, ademais? Se se trata da secretaría provincial, habería que facer un balance do conxunto de labor político na provincia. Hai cousas que saíron mal, efectivamente, fálase de Pontecesures, de Sanxenxo. Pero tamén cousas positivas, como as alcaldías de Silleda, A Estrada ou O Grove. Do que non teño dúbida é de que no Partido Popular hai moita xente á que lle gustaría que eu dimitise. A Núñez Feijoo, sen ir máis lonxe. Gustaríalle que no PSOE dimitísemos todos os que traballamos.

¿Que me di do seu propio partido?

Mire, a pesar de que as miñas responsabilidades van máis aló de Vilagarcía e están en toda a provincia, se eu sentise que o meu respaldo no Partido Socialista de Vilagarcía non existe ou é escaso, sería o primeiro en pasar a ser un afiliado de base máis. Aquí non hai sillóns aos que atarse.

Pero antes falaba de dar a cara. ¿Como, entón?

Hai un órgano que é o fundamental deste partido, o lugar onde se toman as decisións: a asemblea de militantes. A executiva vai convocar unha asemblea para analizar os resultados e o que ocorreu logo das eleccións. �? alí onde hai que dar a cara e manifestar todas as críticas, dúbidas e propostas. Aí é onde hai que falar. E eu vouno facer, como fixen sempre ao longo da miña vida política. Nunca tiven nada que ocultar, nin na miña vida profesional, nin persoal, nin política.

Hai outras voces que entenden que o caso de León demostra a catadura dos partidos políticos…

Hai unha corrente inducida por sectores influíntes en contra dos partidos en xeral. Aos poderosos deste mundo gustaríalles que non existisen organizacións deste tipo. Organizacións que, con todos os seus problemas e os seus erros, son capaces de xestionar o ben común e poñerlle freo aos desmandes dos que sempre queren tirar tallada e beneficios sen importarlles nada máis. Sen partidos políticos, o económico sería o único raseiro para medir calquera xestión. �? doado facer esa crítica cando un non pensa nin pasa todo o día traballando para conciliar posicións e aclarar criterios.

:: La Voz de Galicia :: Ed. Arousa