Só faltaba a Bella Otero no Belén de Valga.

O Belén artesanal en movemento de Valga está a piques de ver a luz. A asociación Amigos do Belén leva desde principios de outubro traballando a reo no local da Rúa Nova, en Campaña, para telo todo preparado. Son unhas 30 persoas que nestas datas, desde 1995, dedican varias horas ó día a construir este Nacemento, cuxa fama traspasa fronteiras. Este ano, ademais, promete novidades, como a instalación de efecos especiais que simulen o día e a noite e a incorporación de figuras e escenas novas, tal é o caso da valguesa máis famosa de todos os tempos, a Bella Otero. Tamén se adiantará a inauguración, que se celebrará o próximo domingo, 2 de decembro, ás cinco da tarde. Poderase visitar diariamente ata mediados de xaneiro.

Maricarmen Castiñeiras, unha das integrantes do colectivo, explicou que instalarán por primeira vez os efectos noita-día e «esperamos que non falle». Lévase a cabo grazas a un programa informático traído desde Cordoba que se completa con 150 bombillas de cores: negras, azuis, verdes, amarelas, vermellas…A través da súa combinación acádanse distintas intensidades de luz e durante a noite brilarán estrelas de fibra óptica. O Belén recolle nuns 250 metros cadrados máis de 3.000 figuras elaboradas con pasta de modelar, papel, aramio e retais. Delas, unhas 350 teñen movemento a través de motores dos limpaparabrisas dos coches. Conta tamén con cinco bombas de auga, unhas 8.000 bombillas e 30.000 metros de cableado. Ademais da Bella Otero, o Belén, que mistura escenas relixiosas (o Misterio de Nacemento acadará o gran protagonismo) e paganas, de gran tradición galega, estreará figuras como un circo e os seus pallasos, enfermería e galiñeiro, e renovaranse outras. Tamén se está a modificar a estrutura. Todos os detalles sobre o Belén artesanal se poden atopar na web www.belendevalga.org

DIARIO DE PONTEVEDRA, 28/11/07