Pousa Antelo recibiu un novo premio na comarca de Sarria.

Pousa Antelo recibiu o Ramón Piñeiro Facer País, que conceden as asociacións culturais da comarca de Sarria
Avelino Pousa Antelo recibiu onte o premio Ramón Piñeiro Facer País, organizado pola asociación Val de Láncara e que elixen as asociacións culturais da comarca de Sarria.
Estaba previsto que o presidente do Consello da Cultura Galega, Ramón Villares, fixese a loanza do galardoado, pero non puido acudir e o seu discurso foi lido polo académico Víctor Freixanes. Na súa intervención, cualificou ao homenaxeado como un home con «vocación de maxisterio, interese pola agricultura e paixón polo galeguismo». Tamén lembrou o discurso de Castelao en 1931 que, como recoñeceu Pousa Antelo, o levou a converterse ao galeguismo.
Unha vez recibido o galardón (unha escultura da Escola de Arte Superior Ramón Falcón, de Lugo), Avelino Pousa Antelo agradeceuno e fixo un repaso polos seus desencontros con Ramón Piñeiro, salientando un congreso do Partido Galeguista en Poio ao que invitaron ao político lucense. «Chegou nun ton provocativo e houbo insultos, o que provocou unha situación molesta», lembrou Pousa. Tamén dixo que ambos estaban no mesmo barco, «servir a Galicia», aínda que emprenderon diferentes rutas e a el, afirmou o homenaxeado, marxinárono.
O acto tamén serviu para que o presidente da Real Academia Galega, Xosé Ramón Barreiro, anunciase que o Día das Letras do 2009, dedicadas a Ramón Piñeiro, se celebrará en Láncara, no lugar onde onte se entregou o premio. Será un acto «solemne e popular», sinalou Barreiro.

LA VOZ DE GALICIA, 19/10/08