Festival de corales en Padrón.

O ámbito artístico e cultural de Padrón ábrese nun amplo abano que abarca diversas facetas e, en tal sentido, prácenos sinalar hoxe aquí o caso da Coral Polifónica Padronesa e quizais un tanto en desagravio polo pouco que ás veces son consideradas estas agrupacións por algún sector do público .

Esta coral á que estamos a referirnos xa ten a súa historia. Foi fundada na Sociedade Cultural Padronesa segundo nos informa o seu presidente, Manuel Bascoy Blanco, que leva á súa fronte dende o ano 2004, por un grupo de socios nos comezos do 1987, tendo dende entón brillantes actuacións ademais de en numerosas cidades galegas, en León, Madrid, Asturias, Portugal, Noirmoutier (Francia), etc.

Co presidente Manolo Bascoy, un total de 36 coristas completan esta formación que dirixe o profesor Santiago López Blanco coa filosofía de manter un grupo de amigos e loitar gozando coa música e as súas intervencións con outras corais para achegar os seus froitos en pro do nivel musical e cultural en xeral da capital do Sar .

No contido da súa habitual programación abránxanse diversos xéneros de música: clásica, relixiosa, popular, habaneras e especial atención a obras galegas,entre elas varios temas de Rosalía de Castro.

Para o vindeiro día 27 do actual organiza un festival concerto na honra a Santa Cecilia no auditorio municipal padronés no que intervirán a Coral de Grado (Asturias), o Orfeón do Barco (Ourense), Coro de Santa Susana de Santiago de Compostela e, por suposto, a Polifónica Padronesa, coral organizadora.
Un concerto que como cada ano para festexar a Patrona dos músicos se celebra sempre no medio de grande interese sobre todo polos entusiastas amantes da música e do canto, e en cuxa homenaxe a patroa Santa Cecilia estará tamén moi presente, que dúbida cabe, a banda Municipal de Música, asemade a outra Coral padronesa que integran os maiores ou da Terceira Idade, polo que a xornada do próximo día 27 suma alicientes aumentando o interese do público.

José Castro Cajaraville (Padrón)
TIERRAS DE SANTIAGO, 16/11/10