A catoirense Mónica Touriño deu un golpe practicamente definitivo na pelexa polo principal título en xogo do canicrós hispano. Gañando a segunda das catro probas que compoñen o calendario da Copa de España na categoría sénior feminina. O pasado domingo, na localidade madrileña de Villamanta. Un triunfo que se suma ao colleitado pola presidenta do Kennel Den na carreira inaugural da Estrada, e que deixa encamiñado o primeiro posto na clasificación final, que xa ocupara o ano pasado.
Ademais da súa superioridade sobre o terreo, nesta ocasión sobre un circuito de 5.900 metros moi rápido e considerado dos mellores de España, Touriño e o seu compañeiro canino Nepal estánse a beneficiar da ausencia das súas dúas maiores competidoras, que só disputaron unha proba cada unha. Ata o punto de que é a madrileña Susana Marchal, terceira na Estrada e cuarta en Villamanta, a que ocupa a segunda praza na xeral provisional.
«Creo que si. Gañando un triunfo máis penso que me bastaría para o título. Pero non botei contas. Prefiro ir carreira a carreira», declaraba onte a presidenta do Kennel Den.
Segundo trofeo da tempada
De non virárselle as cousas, Mónica Touriño aseguraráse o seu segundo trofeo da tempada 2016/17. Un exercicio que arrincou cun cuarto posto no Campionato de Europa de Terra en Inglaterra, no mes de novembro, un mes antes de facerse co título de campioa de España sobre Terra en ?lvega, Soria. A súa descualificación na segunda das tres probas da Liga Galega disputadas ata hoxe, ao romperlle a corda do arnés e escapárselle o debutante Nepal antes da saída, impedirálle pola contra revalidar o triunfo xeral na Liga Galega de Canicrós pese a ter gañado as outras dúas carreiras xa cubertas a falta da cuarta e última.
A vikinga non é a única deportistas do Kennel Den de Catoira en aparecer nos postos nobres das clasificacións da Copa de España de Canicrós. O vigués ?scar Piñeiro, con Argos, manténse á fronte na categoría sénior masculina logo de finalizar a parella segunda na cita de Madrid. O mesmo posto en Villamanta que o acadado en júnior masculina polo pontecesureño José Miguéns e o seu can Sultán, que tamén avanzan segundos na clasificación da Copa.
O Kennel Den tamén estivo representado o pasado domingo por Noelia Piñeiro con Gala, undécimas en bikejoring, en patín pola propia Mónica Touriño con Caramelo e con Fly, decimosegundos, e polo vilagarcián Gumersindo Martínez con Polo e con Lara, decimocuartos; e en canicrós veteráns, por Gumersido Martínez con Tíbet, undécimos.
A Copa de España de Mushing continuará o 4 e o 5 de febreiro en Lérida, para rematar o 19 do mesmo mes en Covarrubias, Burgos.
La Voz de Galicia