Jacobo Domínguez, do Breogán, é o novo campión de España Máster Cadete C-1

O piragüismo arousán voltou a contar a pasada fin de semana cunha boa nómina de resultados nunha cita de carácter nacional. Nesta ocasión, no Campionato de España Máster para Séniores, Júniores e Cadetes. Un título, doce medallas (tres delas de ouro) e os catro representantes da zona entre os nove primeiros na clasificación por equipos, encabezada polo Breogán-Outón Xunqueiriña, conforman o exitoso balance no encoro asturiano de Santa Cruz de Trasona.

A nivel individual o maior éxito chegou da man do palista do Breogán-Outón Xunqueiriña Jacobo Domínguez Otero. A promesa do conxunto grovense proclamouse campión máster cadete C-1 mercede ás súas medallas de ouro nas probas de 500 e de 1.000 metros. Os canoístas do Náutico Pontecesures Adrián Vicente Pesado e Álvaro Loureiro Caamaño foron á súa vez segundo e terceiro. Vicente gracias á súa prata no C-1 500 e o seu bronce nos C-1 1.000, e Loureiro cun quinto posto no C-1 500 e a prata no C-1 1.000. E é que a clasificación final do Master facíase sumando as actuacións de cada piragüista nas dúas distancias olímpicas.

Ademais, subiron ao podio Paulino Otero, do Náutico O Muíño de Ribadumia, ouro no Cadete K-1 500 metros e prata no 1.000, segundo na clasificación Master por detrás de Carlos Garrote (Iberdrola Caja España-Zamora); Rodrigo Germade Barreiro, do Breogán, prata no Xuvenil K-1 500 metros, bronce no K-1 1.000 e terceiro no Master da súa categoría; Andrés Oliveira, do Náutico Pontecesures, prata no Xuvenil C-1 1.000, e David Maquieira, del Náutico, prata no Xuvenil C-1 500, segundo e terceiro clasificados respectivamente no Master, que gañou Miguel Rodríguez, do Rianxo.

Por equipos, o Breogán foi o gañador, co As Torres, sen podios, quinto, o Pontecesures sétimo e o Muíño noveno.

:: La Voz de Galicia ::