«Se nos quitan a parada de Cesures xa non poderei ir a traballar en tren».

María del Pilar Romero. Usuaria cesureña de Renfe

María del Pilar Romero traballa desde hai tres anos en Santiago e depende do tren para poder cumprir co seu horario laboral de luns a venres. Retornada de Suiza hai 9 anos, defende un transporte público de calidade e ve na prevista supresión de paradas como a de Cesures un paso atrás que concellos e Xunta deben evitar.
-¿�?lle cómodo viaxar en tren?
-Para min si. Mellor co bus. Cando hai folga teño que coller o Castromil, e tardo máis en chegar a Santiago.
-¿Como evolucionou o servizo de Renfe nestes tres anos que o leva usando?
-Moito cambio non houbo. Se acaso en negativo. O ano pasado adiantaron o tren que saía ás 13.30 de Santiago a Cesures ás 13.08. Só cambian o que lles dá a gana, sen mirar para o usuario. ¿Quen lles dá de comer? Co AVE ¿a onde imos ter que coller o tren, a Vilagarcía ou Dodro? Teñen que poñer o cercanías. Os alcaldes teñen que facer máis forza. E a Xunta, sobre todo. Había que terlle metido man a isto hai moito tempo.
-¿Seguirá empregando o tren trala supresión da parada de Pontecesures?
-Non poderei. Terei que ir en bus ou mercar un coche. Pero Santiago é unha cidade moi mala para aparcar, e se tes que pagar por riba o párking… A nivel de transportes Santiago ten de capital de Galicia o nome. A Galicia fáltalle moito para poñerse ao nivel do centro de Europa.
-¿Cre que con máis frecuencias habería máis xente que collese o tren?
-Seguro que si. Pola mañá só temos trens con dirección a Santiago ás 7.10, ás 8.30, ás 10.30 e ás 14.15. Se houbese máis frecuencias, xa só para ir a Padrón, habería moita máis xente que collería o tren.

LA VOZ DE GALICIA, 29/06/08