A igrexa do convento de Herbón acolle un concerto de Nadal.

A igrexa do convento franciscano de Herbón, no concello de Padrón, acolle o próximo sábado, a partir das oito da tarde, a terceira edición do Concerto de Nadal que organiza a Asociación Sementar. Nesta ocasión, a actuación corre a cargo do Coro da Rá, pertencente a escola de música Estudio de Santiago de Compostela. No seu repertorio, interpretado por voces masculinas e femininas, mestura estilos do máis variado.
Como ven sendo habitual en todos os concertos celebrados ata o momento por Sementar na igrexa do convento de Herbón, o do sábado tamén é gratis. Con esta actividade, a asociación que ten a súa sede no mosteiro padronés pretende atraer público a un espazo, a igrexa do convento, que demostra ano tras ano ser susceptible de acoller eventos de tipo cultural e musical.
Coa do sábado, é a terceira actuación que acolle no que vai de ano a igrexa do convento franciscano, despois de que o programa de Espazos Sonoros da Consellería de Cultura trouxera a Herbón os concertos de Silva de Sons, cos bailaríns Eva Narejos e Juan Jesús García e do prestixioso frautista barroco Wilbert Hazelzet.

LA VOZ DE GALICIA, 15/12/10