Vendaval de talento en Cordeiro.

Un auténtico vendaval de talento. Así definiron, e con razón, o Festival Axenda 21 que tivo lugar a semana pasada no Auditorio de Cordeiro. Estivo protagonizado por máis de 80 alumnos do IES Valga que avogaron pola defensa do medio ambiente a través das súas actuacións. «Voa con nós» foi o lema, reflectindo o desexo de manter o aire libre de polución. Os flamantes presentadores foron Sara Seco e Pedro Calvo, que deleitaron ao público coa súa simpatía e enxeño. No fondo do escenario houbo un decorado espectacular feito polos propios alumnos e un grupo de seis foi cambiando ao longo do festival para amosar como unha cidade suxa e contaminada pódese converter notra limpa e chea de cor.
Entre unha cousa e outra, un festival de case tres horas. Zoe Santos fixo unha preciosa coreografía de ximnasia rítmica. Brais Villar interpretou maxistralmente un preludio de Chopin ao piano. Alex Barreiro amosou gran talento humorístico ao recitar un monólogo de Benedetti e Adrián Castiñeiras fixo rir a todos imitando a Nadal e Mourinho ante as preguntas do «xornalista» Yago Brea.
Non faltou o rap, da man de Jonattan Blanco, José Castiñeiras. Marcos Lorenzo e Borja Lorenzo.
Actores divertidos foron Raquel Bustelo, Jéssica Freire, Fátima Mato, Luz Iglesias, Ismael Piñeiro, Sergio Piñeiro, Maite Rodríguez, María Arufe, Elvis García, Samuel García, Fran Bragado, e Lucía Franqueira. Uxío Lorenzo e Paula Vázquez leron poesías de autores galegos sobre o tema do aire. O festival complementouse coa actuación de solistas vogais, músicos e bailaríns, que interpretaron temas moi coñecidos.

DIARIO DE PONTEVEDRA, 23/02/11