«Toda a parroquia de Cruces está alarmada despois do sucedido».

A Garda Civil prosegue este martes coas pescudas para localizar aos autores do asalto á casa reitoral de Padrón ocorrido na noite do domingo, que se saldou co cura ferido e a súa asistenta falecida. O alcalde de Padrón recoñeceu esta mañá en Radio Obradoiro que «toda a parroquia está alarmada» pero quixo facer «un chamamento á tranquilidade» porque «se trata dun feito puntual». Sobre a falecida, asistenta do párroco, sinalou «que era unha máis da parroquia» e trasladou o «pésame á familia e amigos» da vítima. Sobre a investigación en curso para dar cos autores do ataque, Antonio Fernández Angueira  explicou que está «baixo segredo de sumario» e que durante todo o día de onte a policía xudicial estivo na casa parroquial recollendo probas. Segundo apuntou, barállanse todo tipo de hipóteses e fixo fincapé en que «compre esperar» a que a investigación dea resultados. O alcalde dixo que a casa reitoral fora asaltada en dúas ocasións, pero explicou que fora «algo menor» e nun dos casos dérase cos culpables.

Segundo indicaron a Europa Press fontes da investigación, os axentes proseguen coas xestións para localizar o vehículo do cura, no que fuxiron os asaltantes. O cura da parroquia de Cruces regresou onte, tras recibir o alta hospitalaria, durante unhas horas á casa reitoral na que foi vítima do asalto para colaborar na investigación que leva a Policía Xudicial da Garda Civil. Segundo Fernández Angueira, o crego «só ten unhas mazaduras» pero está «moi afectado anímicamente» polo acontecido.

OS FEITOS

Os feitos sucederon sobre as 21,00 horas do domingo na casa reitoral situada na parroquia de Cruces, en Padrón. Foi o propio párroco o que chamou ás emerxencias tras ser amordazados a súa asistenta e el por varias persoas, tres, segundo as manifestacións do cura.

A casa reitoral estaba toda «revolta» cando chegaron as forzas de seguridade, segundo apuntaron fontes da investigación, que indicaron o «roubo» como móbil do suceso.

Efectivos da Policía Xudicial han acudido á casa reitoral para recoller probas e esclarecer o sucedido. Supostamente os asaltantes fuxiron no coche do párroco, un vehículo branco da marca Peugeot.

El Correo Gallego