O BNG de Pontecesures critica a escasa difusión do premio Borobó por parte do goberno local.

Estamos a poucos días de rematar o 2016. Un ano que estaba chamado a ficar na memoria de Cesures e dos cesureños por ser conmemorativo do nacemento de un dos nosos máis ilustres veciños: Raimundo García Domínguez, Borobó
Remata o ano e, o que podía ser un broche de ouro de este centenario, o «Premio Xornalístico Raimundo García, Borobó» é, na realidade, un fracaso grazas, ó noso entender, á pésima xestión da convocatoria levada a cabo polo equipo de goberno
A convocatoria do premio, que pretendía homenaxear ó escritor e mestre do xornalismo galego no centenario do seu nacemento,foi acordado por unanimidade da anterior corporación municipal (BNG-PSOE) e conta coa colaboración da Deputación de Pontevedra. A entidade provincial participaba no premio aportando a totalidade do premio; asumindo os costes de impresión de cartelería e bases; e comprometéndose a editar un compendio das obras que se presentaran ó premio
No pasado pleno, preguntamos ó alcalde cal era o número de obras presentadas ó concurso. A resposta non foi moi alentadora, UNHA SOA OBRA presentada a concurso.
Non podemos dicir que nos sorprendera a resposta pero sí que foi unha decepción que, o que estaba chamado a ser un dos actos máis importantes do centenario se quede en nada. O 5 de decembro remataba o prazo de presentación e o número de obras presentadas seguía a ser o mesmo
No BNG temos claro que o equipo de goberno non tivo, en ningún momento, esta convocatoria como unha das súas prioridades por, entre outros, os seguintes motivos
– Tanto a cartelería como os folletos coas bases non foron recollidos da imprenta provincial ata finais do mes de outubro cando estaban listos dende o mes de agosto.Quedaron aparcados nas oficinas do Concello á espera de tempos mellores….
– A publicidade na prensa de maior tirada foi inexistente cando, o habitual neste tipo de premios, é publicitalo no maior número de diarios sobre todo cando se trata dunha primeira edición. O señor Seage ofendeuse moitísimo ante esta proposición, insinuando se non sabíamos o que era un e-mail ¿? e que él mandara un montón de correos a un montón de xente, da que non citou a ninguén, por certo e, visto o éxito da convocatoria, non deberon surtir o efecto desexado…..
– As bases foron feitas de presa e correndo, non albergamos a mínima dúbida: un prazo de publicación surrealista (do 1 de agosto e o 31 de novembro de 2016) deixando fóra artigos publicados en torno ó 10 de Xullo, data da conmemoración ou limitarse á prensa escrita deixando fóra os proxectos audiovisuais
Cando preguntamos polo papel da Xunta de Galicia, cuxo logo aparece no cartel da convocatoria, a resposta do alcalde foi que exercía tarefas de asesoramento….Bueno, pois podemos concluir que moi ben asesorados dado o éxito de convocatoria
A día de hoxe non sabemos que vai pasar co premio, xa que o alcalde non foi quén de contestar a esta pregunta. O que sí temos cada día máis claro é que, a cultura ó noso equipo de goberno, importalle bastante pouco e cada día que pasa deixano máis claro

BNG Pontecesures