Besteiro pide unha negociación que preserve emprego e actividade na planta de Nestlé en Pontecesures

O secretario xeral e portavoz parlamentario do PSdeG, José Ramón Gómez Besteiro, pediu unha negociación que preserve o emprego e a actividade na planta de Nestlé en Pontecesures.

Besteiro reuniuse co Comité de Empresa e o cadro persoal da planta para coñecer a situación creada polo ERE anunciado pola multinacional. Asegurou que se trata dunha “planta de referencia mundial” que funciona desde 1939, que dá emprego a case 200 persoas e que produce todo o leite condensado que Nestlé vende en Europa, Oriente Medio e o norte de África.

O líder socialista defendeu que “o que está en xogo non é só un cadro de persoal, é o futuro industrial dunha comarca enteira” e advertiu de que calquera redución na actividade tería impacto directo non só en Pontecesures, tamén en Valga, Dodro e Padrón, e nas gandarías galegas que abastecen a planta.

Fonte: Europa Press