A delimitación do porto de Pontecesures (DEUP) está en información pública: dous meses para presentar alegacións
A delimitación dos espazos e dos usos portuarios (DEUP) do porto de Pontecesures está desde hoxe en información pública: a resolución de Puertos de Galicia publicouse no DOG nº 199 deste martes 20 de outubro e abre un prazo de dous meses —que comeza mañá 21 de outubro e remata o 21 de decembro— para que as persoas físicas ou xurídicas interesadas examinen o documento e presenten por escrito reclamacións ou alegacións.
O documento foi elaborado pola Área de Explotación e Planificación Portuaria de Puertos de Galicia, conforme ao artigo 52 da Lei 6/2017, de portos de Galicia. O expediente identifícase coa clave 13-01-DEUP-202609 (porto de Pontecesures – zona sur).
As alegacións preséntanse preferiblemente por vía electrónica co formulario normalizado IF508C na sede electrónica da Xunta (sede.xunta.gal). A presentación electrónica é obrigatoria para administracións públicas, persoas xurídicas, entidades sen personalidade xurídica, profesionais con colegiación obrigatoria, autónomos e representantes; as demais persoas poden presentala presencialmente en calquera dos lugares e rexistros establecidos na normativa do procedemento administrativo común.
O anuncio non inclúe o documento técnico: remite á páxina de DEUP de Portos de Galicia. Con todo, na mañá de hoxe o documento do porto de Pontecesures aínda non estaba publicado nesa páxina, onde só constan outros portos. Desde pontecesures.net seguimos o asunto: se nuns días persiste a ausencia, reclamarase directamente a Portos de Galicia citando a clave do expediente (13-01-DEUP-202609). E a falta de dispoñibilidade do documento durante o prazo de información pública sería en si mesma un motivo de alegación.
Fuente: DOG nº 199 — Resolución de Puertos de Galicia do 5 de outubro de 2026
