Todo preparado para o reto de David Meca.

O gran nadador de fondo estivo a facer hoxe uns adestramentos nas augas da ría de Arousa onde comprobou a fría temperatura das augas (uns 9 graos). O remonte a nado de mañá, 5 de xaneiro, está a espertar unha gran expectación, e serán moitos os medios de comunicación que cubrirán esta travesía de 22 quilómetros. A comitiva que acompañará a Meca será numerosa, con cinco embarcacións e bastantes piragüistas. Practicamente unha cabalgata moi vistosa polo río Ulla con sirenas anunciando o paso do deportista.
Entre ás 17:30 e ás 18:00 está prevista a chegada do nadador ao pantalán do peirao de Pontecesures. Pero dependendo das condicións climatóloxicas e chegada pode ser antes ou despois.
Faise fincapé en que a travesía non é unha excursión, senón un difícil reto, sobre todo pola baixa temperatura das augas nesta época do ano.
Compre dicir tamén que o nadador de conquerir superar a proba, vai estar pouco tempo en Pontecesures, xa que polo esforzo e polo frío necesitará trasladarse con rapidez nun vehículo ao hotel para á súa recuperación.
O Concello de Pontecesures de novo fai un chamamento aos veciños de toda a comarca para recibir e ovacionar ao campión. Pode ser un fito histórico que quedará na retina dos asistentes.