Un conto musical para descubrir os instrumentos: arredor de 500 escolares de Valga e Pontecesures nos concertos didácticos
Arredor de 500 alumnos de Infantil e Primaria de Valga e Pontecesures participaron nas sesións didácticas que a Escola de Música de Valga organizou no Auditorio, dentro da súa aposta pola divulgación musical dirixida a escolares. Na actividade tomaron parte o alumnado do CRA Valga, os CEIP Baño-Xanza e Xesús Ferro Couselo, o CPI Pontecesures e usuarios do CODI.
O profesorado da Escola de Música foi o encargado de ofrecer estes concertos, interpretando un conto musical: a historia dunha nena apaixonada pola música que viaxaba por diferentes mundos sonoros, que serviu como vehículo para presentar as familias instrumentais de corda, percusión, vento madeira e vento metal. Deste xeito, os escolares puideron identificar os sons e características de cada instrumento dunha forma amena.
A actividade destacou ademais polo seu carácter interactivo: varios alumnos subiron ao escenario para probar os instrumentos e experimentar o rol de directores de orquestra por un día.
Con actividades coma esta, a Escola Municipal de Música mantén o seu compromiso coa formación cultural e o fomento do interese pola música entre a mocidade do concello e da bisbarra.
Fuente: Diario Gallego
