O auditorio de Valga informou onte da súa programación para o mes que acaba de arrincar. Unha programación con dous bloques principais. Charlas de formación e de información, e oferta teatral.
Respecto ás primeiras, mañá, xoves, de catro a oito da tarde nas salas da instalación valguesa poderáse profundizar e aprender sobre a importancia do apoio psicosocial aos coidadores de persoas dependentes.
O plan de prevención de drogodependencias será o tema a tratar en sendas citas o venres 5, o luns día 8 e o martes 16, de catro e media a seis da tarde. E o luns 22 os interesados poderán escoitar no auditorio de Valga unha charla arredor da nutrición.
Dúas son as actuacións teatrais programadas no centro de Cordeiro este mes. A primeira delas, a escenificación de O divino sainete , de Manuel Curros Enríquez, a cargo do grupo lugués Achádego este domingo ás seis da tarde. Sete días despois, o domingo 14, O Aturuxo de Narón subiráse ás táboas de Valga para representar Non todos os ladróns veñen por mal .
Cooperativismo
Ademais, o auditorio de Valga acollerá unha xornada de cooperativismo o sábado 13, e unha asemblea dos testigos de Jehová, o domingo 21.
A programación do centro cultural de Cordeiro complétase coas tres visitas guiadas que farán os alumnos do CEP Xesús Ferro Couselo e do CEIP de Pontecesures a vindeira semana á exposición Agua: o sangue da vida , nas súas salas ata o día 12.
LA VOZ DE GALICIA, 03/11/10
