Pontecesures, entre os concellos da Arousa que mellor pagan aos provedores
O Ministerio de Facenda publicou o balance trimestral da morosidade dos concellos, correspondente ao período entre abril e xuño, e unha vez máis as cifras deixan a Pontecesures en boa praza: o Concello pagou as súas facturas a unha media de 7 días e pechou o trimestre cunha débeda con provedores de apenas 9.600 euros.
Pola contra, outros cinco concellos da comarca superan o prazo legal dun mes para pagar: Cambados (123 días de media, o máis alto), Ribadumia (96 días e unha débeda de 2 millóns de euros, o dobre que fai un ano), Vilanova (84 días), Catoira (71 días) e Valga (53 días), ademais da Mancomunidade do Salnés, que paga a 43 días.
Na comarca, os máis rápidos son Meaño e Meis, que practicamente pagan ao momento, con períodos medios inferiores a dous días e sen débeda pendente. Pontecesures colócase xusto detrás deles, entre os concellos que mellor cumpren coas empresas que traballan coa administración, desde construtoras a distribuidoras de material ou autónomos da cultura.
Non é un detalle menor: cobrar a tempo é vital para negocios e provedores, e estas cifras axudan a que quen traballa co concello teña liquidez e tranquilidade para seguir adiante.
Fonte: Faro de Vigo
