Comerciantes e hostaleiros de Pontecesures ameazan con mobilizacións se a Xunta non suprime o peche perimetral que afecta á localidade. Din que están coa auga ao pescozo e que xa non aguantan máis. Cargan tamén contra o Concello, ó que acusan de nin tan sequera amosar disposición de axudar.

Con tres casos activos a día de hoxe, Pontecesures mantén o peche perimetral vixente dende o venres.  Unha medida que deixa contra ás cordas a comerciantes e hostaleiros.

Enma ten unha tenda e Sergio un bar. Falan en nome de moitos establecementos do municipio que ven os seus ingresos freados polo peche que agrava unha situación xa de por si complicada.

Máis alá das trabas para consegui-las achegas da Xunta, lamentan tamén a actitude do Concello ante a situación de moitos negocios. Din que o goberno local non fixo nada por axudar. Segundo aseguran, o alcalde lles dixo que o Concello non pode facer nada máis por eles.

Agora din estar fartos. Ameazan con saír á rúa protestar. A primeira: convocar unha mobilización se se mantén o peche perimetral.

O peche perimetral de Pontecesures será analizado mañá na reunión do Comité Clínico que asesora á Xunta. En calquera dos casos, o municipio continuará pechado, como mínimo, ata o venres.

Canal 7