Dezaseis dornas honraron a Rosalía cun percorrido dende Valga a Padrón.
Un total de dezaseis dornas participaron onte na segunda edición da remontada do Ulla organizada pola Fundación Rosalía de Castro e pola Asociación Cultural Dorna da Arousa. Baixo o título Que inchadiña branca vela, as embarcacións conmemoraron este verso da poetisa do Sar na súa publicación Cantares gallegos.
O percorrido desta singular ruta deu comezo no lugar de Vilarello, no municipio de Valga, dende onde navegaron polas augas do río Ulla até o Paseo do Espolón, na capital do Sar. As dezaseis dornas participantes nesta iniciativa procedían tanto da Illa de Arousa coma do Grove.
El Correo Gallego
