Os Penoucos renova obaixoulla.gal: 4.057 elementos do patrimonio do Baixo Ulla nun catálogo aberto, con 122 en Pontecesures
A asociación cultural Os Penoucos de Valga, que celebra este ano os seus 20 anos de actividade, estreou unha nova versión da web obaixoulla.gal, o catálogo dixital que reúne e documenta a riqueza patrimonial do territorio polo que discorre o tramo final do río Ulla antes de se facer ría. A plataforma alcanza xa os 4.057 elementos catalogados, con novo deseño, navegación mellorada e adaptación completa a móbiles. A presentación fíxose na Casa de Rosalía, da man de Miguel Lois (Os Penoucos) e Alberto Permuy (Comunidade O Zulo, responsable do desenvolvemento técnico).
O inventario abrangue o patrimonio cultural, natural e paisaxístico do Baixo Ulla en sete municipios: Catoira, Dodro, Padrón, Pontecesures, Rianxo, Valga e Vilagarcía de Arousa. Os hórreos son a categoría máis numerosa, con 2.048 rexistros, aos que se suman 602 elementos de arquitectura da auga, 324 elementos relixiosos, 298 referencias arqueolóxicas, 244 construcións de arquitectura civil, 231 obras civiles, 80 edificios de arquitectura relixiosa, 89 espazos naturais, 73 de arquitectura industrial e 68 panorámicas.
En Pontecesures o catálogo recolle 122 elementos, consultables en obaixoulla.gal/elementos?concello=29: desde a Cerámica Celta ou a Casa natal de Carlos Maside en San Xulián de Requeixo até a Ponte de Cesures, o Porto de Cesures, a zona húmida da Tarroeira ou a nómina de hórreos de Porto, Condide e o Couto, entre moitos outros.
Entre as novidades destaca un mapa interactivo mellorado que permite consultar tanto a fotografía aérea actual como as imaxes do voo americano de 1956-1957: a comparación de ambas cartografías ofrece unha perspectiva dos profundos cambios do territorio nos últimos 70 anos. A web aspira ademais a construír un relato colectivo do territorio con metodoloxía participativa: calquera persoa pode enviar comentarios, suxestións, textos ou fotografías a través do formulario de contacto para que o inventario siga a crecer.
O proxecto aposta tamén polo acceso libre ao coñecemento: software e mapas de código aberto, datos consultables e descargables libremente e en formatos estruturados non propietarios, para que poidan ser reutilizados por investigadores, colectivos culturais ou administracións. E todo desenvolvido sen recibir ningún tipo de subvención oficial: o seu mantemento descansa no traballo voluntario e desintereseado de quen cre no valor do territorio no que vive e na necesidade de preservar e difundir a súa memoria.
Fuente: Faro de Vigo (Manuel Méndez)
